Gihangyo sa nagkadaiyang sektor si Pangulong Ferdinand Marcos Jr. nga maghatag og konkretong mga solusyon nga labaw pa sa mga saad ug mga nahimo sa administrasyon atol sa iyang ikalimang State of the Nation Address (SONA) karong Lunes, Hulyo 27, 2026.
Nagkanayon ang mga mangingisda sa Zambales nga naapektuhan sila sa pagsaka sa presyo sa lana ug tensiyon sa West Philippine Sea (WPS), ug nagtuo sila nga ang pagpanalipod sa ilang panginabuhian magsugod pinaagi sa mas lig-on nga presensiya sa gobyerno sa maong kadagatan, pinaagi usab sa padayon nga suporta alang sa mga mananagat.Nanawagan usab si Regino Romero, chair sa Subic Hook and Line Fishermen’s Association, sa gobyerno nga pakusgon ang pagpapatrolya aron mapanalipdan ang mga Pilipinong mangingisda batok sa agresyon sa Chinese Coast Guard (CCG) ug mapalapdan pa ang fuel subsidies alang kanila nga nagapangisda duol sa Bajo de Masinloc (Scarborough Shoal).
Samtang, sa transportation sector, gipadayag sa mga public utility drivers ang ilang hangyo nga hatagan sila og pagtagad gumikan sa nagkagamay nilang kita tungod sa padayon nga pagsaka sa presyo sa lana, nga nakaapekto sa ilang inadlaw nga panginabuhian ug sa ilang abilidad sa pagtagbo sa adlaw-adlaw nga panginahanglan sa ilang mga pamilya.
Sa natad sa agrikultura usab, gi-aghat sa Kilusan Para sa Tunay na Repormang Agraryo at Katarungang Panlipunan ang Pangulo nga panalipdan ang mga yutang pang-agrikultura, sulbaron ang dugay nang mga panaglalis sa yuta, hunongon ang pagbaliktad sa mga nakab-ot nga reporma, ug tapuson ang kriminalisasyon sa mga mag-uuma nga nanalipod sa ilang mga katungod.
Nanawagan usab ang labor sector nga hatagan og prayoridad ang lima ka nag-unang isyu sa labor sector, lakip na ang pagpasa sa legislated wage hike, pagtubag sa kontraktwalisasyon, ug pagsulbad sa nagpadayon nga wage gap sa sweldo sa mga mamumuo.
Pinaagi sa maong mga panawagan, naglaom ang nagkadaiyang sektor nga matagad sa administrasyon ang ilang mga kabalaka ug mapaluyohan pinaagi sa konkretong mga programa ug polisiya nga motubag sa ilang mga panginahanglan ug makapaayo sa ilang panginabuhian.
