Gisusi pag-ayo sa mga awtoridad ang giingong bomb threat batok sa usa ka elementaryang tulunghaan sa Malagamot, Barangay Panacan, Davao City, aron masiguro ang kaluwasan sa mga tinun-an ug mga magtutudlo. Sumala pa sa sketchy report, nakadawat ang Police Station 4–Sasa og tawag gikan sa Central 911 alas 11:02 sa buntag karong Hulyo 24, 2026, mahitungod sa giingong bomb threat, hinungdan nga gilusad dayon ang verification ug security response.
Sa gihimong imbestigasyon, nasayran nga ang impormasyon naggikan sa usa ka molupyong babaye sa Phase 1, Transmitter Residential Heights, Malagamot, nga maoy nagpakita sa giingong mensahe sa iyang selpon ngadto sa usa ka 54-anyos nga babaye nga apohan sa usa sa mga estudyante sa maong eskwelahan.
Dugang pa niini, samtang naghulat sa iyang apo nga mahuman sa klase, gipahibalo sa apohan ang maong impormasyon ngadto sa Assistant Principal II sa eskwelahan aron matagad dayon sa administrasyon. Hinuon, giingon sa apohan nga wala siya makaseguro kung ang impormasyon nga iyang nakita sa selpon naggikan ba sa Messenger, SMS, o usa ka Facebook post.
Lakip sa gilusad nga mga lakang sa mga otoridad ang makuting inspeksiyon sa EOD K9 Team sulod sa tulunghaan aron masuta kon adunay tinuod nga hulga ug aron mapanalipdan ang mga tinun-an, magtutudlo, ug ubang personahe sa eskwelahan. Sa kasamtangan, padayon ang imbestigasyon sa kapulisan aron mailhan ang tinubdan sa giingong bomb threat ug mapanubag ang responsable kon mapamatud-ang adunay paglapas sa balaod.
