Miangkon si House lead prosecutor ug Batangas 2nd District Representative Gerville “Jinky Bitrics” Luistro nga nakabati siya og kakulang sa iyang mga tubag atol sa impeachment trial ni Bise Presidente Sara Duterte human gilimitahan sa “yes or no” ang pipila niyang tubag sa mga pangutana sa mga senator-judge nga sila Senador Robin Padilla ug Senador Pia Cayetano.
Sumala pa ni Luistro, kabahin sa normal nga proseso sa pagtaral ang pagpangutana sa mga senator-judge aron maklaro ang mga isyu, apan importante usab, matud niya, nga mahatagan og hustong pagpasabot ang konteksto sa matag tubag. Dugang pa niini, gipangutana siya ni Senador Pia Cayetano kabahin sa katuyoan sa affidavit ni Arturo Lascañas, samtang gikuwestyon usab ni Senador Robin Padilla kon kini ba adunay notaryo.
Gipasabot sa prosecution nga ang maong affidavit gipresentar lamang aron ipakita ang dagan sa imbestigasyon sa National Bureau of Investigation o NBI ug dili isip pamatuod sa kamatuoran sa mga sulod niini. Tungod niini, naghimo og manifestation si Luistro aron matala sa rekord sa korte ang iyang tibuok nga pagpasabot kabahin sa maong isyu. Kahinumduman nga nagpahimangno usab si Senate President pro tempore Francis “Chiz” Escudero nga ang affidavit ni Lascañas gipresentar lamang isip bahin sa proseso sa imbestigasyon.
Sa laing bahin, giinsistir usab ni Senador Padilla nga ang tahas sa prosekusyon dili lamang ang pagdaog sa kaso kondili ang pagpangita usab sa kamatuoran. Hinuon, gisupak kini ni Luistro ug mipahayag nga ang pangunang responsibilidad sa prosekusyon mao ang pagpamatuod sa kaso batok sa hingtungdan nga opisyal pinaagi sa mga ebidensya nga ilang ipresentar.
Sa kasamtangan, nagpadayon ang impeachment trial ni Bise Presidente Sara Duterte samtang gisusi sa impeachment court ang mga alegasyon nga gilatid sa Articles of Impeachment.
