Nagplano nga magpahigayon og panagtigom si Department of Foreign Affairs (DFA) Secretary Ma. Theresa Lazaro uban kang China Foreign Minister Wang Yi aron hisgutan ang bilateral relations tali sa Pilipinas ug China. Gipahibalo ni DFA spokesperson on ASEAN matters Dominic Xavier Imperial ang maong serye atol sa sunod-sunod nga miting ug komperensya sa mga foreign ministers sa ASEAN nga gipahigayon sa Pilipinas karong semanaha hangtod sa Biyernes, Hulyo 24.
Sumala pa kang Imperial, dili pa niya tukion ang posibleng mga isyu nga hisgutan sa duha ka opisyal, lakip na kung apil ba ang giingong AI-generated video sa China Daily nga naghulagway sa mga Pilipino isip unggoy ug naghisgot batok sa 2016 Arbitral Award kalabot sa West Philippine Sea. Dugang pa niini, giila sa DFA ang kahinungdanon sa maong panagtigom tungod kay dili lamang bilateral relations sa duha ka nasod ang hisgutan, kondili apil usab ang nagkalain-laing isyu nga adunay epekto sa rehiyon ug sa ASEAN.
Sa pagkakaron, wala pa maghatag og tukmang petsa ang DFA kung kanus-a ipahigayon ang maong panagtigom nila Lazaro ug Wang Yi. Kahinumduman nga una nang gipahibalo sa DFA nga gilauman usab ang pag-apil ni US Secretary of State Marco Rubio sa ASEAN-related meetings nga ipahigayon sa Metro Manila karong semanaha.
