Gihuman na sa Philippine National Police (PNP) ang katapusang pagpangandam sa security deployment alang sa ikalimang State of the Nation Address (SONA) ni Pangulong Ferdinand Marcos Jr. karong Lunes, Hulyo 27, 2026.
Matud ni PNP Chief PGen. Melencio Nartatez Jr., nahuman na ang komprehensibong security plan alang sa SONA ug anaa na sa katapusang hugna ang koordinasyon sa mga yunit, lakip ang rehearsals ug deployment aron masiguro ang luwas, hapsay, ug malinawon nga kalihokan alang sa tanan.
Una nang gipahibalo sa PNP nga mokabat sa 20,000 ka kapulisan ang ipakatap aron motabang sa seguridad atol sa tinuig nga ulat sa nasud sa Pangulo, uban sa suporta sa Armed Forces of the Philippines (AFP) ug Philippine Coast Guard (PCG).
Nagpadayon usab ang koordinasyon sa mga otoridad uban sa partner agencies ug mga lokal nga panggamhanan aron masiguro ang episyenteng pagpatuman sa security operations ug hapsay nga pagdumala sa trapiko.
Sa mga gilaumang mga protesta nga ipahigayon dungan sa SONA, nagpahinumdom ang PNP sa tanang kapulisan nga ipatuman ang maximum tolerance, magpabiling propesyonal, ug tahuron ang konstitusyonal nga katungod sa matag indibidwal.
