Gilauman nga ipatuman pagka Martes, Hulyo 21, 2026 ang dako nga pagsaka sa presyo sa mga produktong petrolyo nga mahimong mopabug-at na usab sa gasto sa mga motorista.
Base sa lihok sa pangkalibutanong merkado sa lana, gilauman nga mosaka ang presyo sa diesel og ₱10 hangtod ₱11 kada litro; gasolina og ₱3 hangtod ₱4 kada litro; ug kerosene og ₱11 hangtod ₱12 kada litro.
Gikonektar ang oil price hike sa nagpadayon nga tensiyon tali sa Estados Unidos ug Iran.
Tungod niini, namatikdan kaniadtong Dominggo, Hulyo 19, 2026 ang daghang motorista sa mga gasolinahan sa pipila ka bahin sa nasud nga nagpa full talk na og gasolina ug diesel sa ilang mga sakyanan aron makalikay sa dakong pagsaka sa presyo pagka Martes.
Samtang, dili lamang mga motorista ang maapektuhan sa pagsaka sa presyo sa lana, kondili lakip na usab ang transportasyon sa mga utanon paingon sa dagkong merkado sa nasud.
Tungod niini, napugos ang pipila ka mga negosyante nga magpataas usab og presyo sa ilang mga baligya aron mabawi ang dugang nga gasto.
Bisan pa niini, gibutyag sa Department of Trade and Industry (DTI) nga wala pa gilauman ang dayon nga pagsaka sa presyo sa mga batakang palaliton tungod kay wala pay mga manufacturer nga nagsumite og hangyo alang sa price adjustment sa ilang mga produkto.
Gilauman usab nga ipahibalo sa Department of Energy (DOE) ang opisyal nga fuel price adjustment sa umaabot nga mga adlaw samtang nagpadayon ang state of national energy emergency sa Pilipinas.
