Gipasiguro sa Department of Trade and Industry (DTI) nga walay pagtaas sa presyo sa mga basic ug prime commodities sa pagkakaron, bisan pa sa gilauman nga pagsaka sa presyo sa produktong petrolyo sa umaabot nga semana tungod sa bag-ong tensiyon tali sa Estados Unidos ug Iran.
Sumala ni DTI Secretary Cristina Roque, wala pay nadawat nga mga petisyon gikan sa mga manufacturers alang sa price adjustment sa mga baligya.
Matud pa sa kalihim, sayo pa ang pagtagna sa posibleng epekto sa kasamtangang sitwasyon, busa mas angay nga hulaton una ang mga mosunod nga kalamboan.
Kahinumdoman nga sa unang pag-ulbo sa panagbangi tali sa Iran ug Estados Unidos, misaka ang presyo sa produktong petrolyo human sa mga pag-atake ug pagsira sa Strait of Hormuz, usa sa mga nag-unang agianan sa mga barkong nagkarga og lana.
Tungod niini, naapektuhan usab ang gasto sa transportasyon sa mga produkto, maong nabalaka ang publiko nga mahimong mosaka pag-usab ang presyo sa mga nag-unang baligya samtang nagpadayon ang tensiyon sa Tungag Sidlakan.
