Gikumpirma sa Department of Foreign Affairs (DFA) nga luwas nga nakatabok sa Strait of Hormuz ang 81 ka Pilipinong seafarers nga sakay sa upat ka mga barko.
Sumala sa DFA, ang maong mga seafarers sakay sa MV Western Doncaster, MV Vivian Trader, MV Lyng Trader, ug MV Eva Fuji nga malampusong nakakompleto sa ilang paglayag sa maong rutang pandagat tali sa Hunyo 24 ug Hulyo 1 ning tuiga.
Gipagawas ang maong pahayag human sa pagsaka pag-usab sa tensyon tali sa Estados Unidos ug Iran.
Gipasalamatan usab ang International Maritime Organization (IMO) tungod sa ilang suporta sa mga civilian shipping ug sa koordinasyon sa pagluwas sa mga seafarers nga naapektuhan sa kagubot.
Pinaagi sa pakigtambayayong sa United Nations ug IMO, nakatabang na sila sa pagpabakwit sa 136 ka mga barko ug kapin sa 2,900 ka mga seafarers nga naapektuhan sa sitwasyon.
