Gilimod sa kampo ni Vice President Sara Duterte ang alegasyon nga ilang gipugngan ang pagpagawas sa bank ug tax records nga gihangyo sa House prosecution panel alang sa impeachment trial.
Sumala ni Atty. Michael Poa, tigpamaba sa defense team, wala sila mahadlok nga ipagawas ang bank records ni VP Sara, apan gusto lamang nilang masiguro nga ang proseso nahiuyon sa balaod ug sa Konstitusyon.
Gipasiugda usab sa depensa nga klaro ang posisyon sa Korte Suprema bahin sa katungod sa privacy ug due process, maong ilang gipahinumdoman ang mga senador nga nagsilbing mga judge sa impeachment trial.
Sa ikaunom nga adlaw sa pagtaral, gihisgutan pag-usab ang hangyo sa House prosecutors nga magpagawas ang Senado og subpoena aron makuha ang bank, tax, ug Anti-Money Laundering Council (AMLC) records sa Bise Presidente ug sa iyang bana nga si Atty. Manases Carpio.
Misupak ang depensa sa maong hangyo tungod kay alang kanila mahimo lamang kini nga usa ka “fishing expedition” o pagpangita og ebidensya nga walay igo nga basehan. Matod usab nila, posible nga malapas ang katungod sa privacy sa magtiayon kung ipamugos ang pagpagawas sa ilang financial records.
Samtang, magpagawas ang Impeachment Court og desisyon karong Hulyo 20, 2026 bahin sa maong hangyo, human sa caucus sa mga senator-judge kaniadtong Miyerkules sa hapon.
Sumala ni Presiding Officer Francis “Chiz” Escudero, nagkasinabot na ang mga senator-judge nga hatagan og igong panahon ang matag usa aron tun-an ang mga komplikadong isyu sa subpoena, ug tugotan usab ang mga gusto pa mangutana sa duha ka panig sa sunod nga pagdungog.
Gitugyan na sa depensa sa impeachment court ang paghimo sa desisyon ug giingong ilang sundon ang mahimong hukom niini. Nagkanayon usab ni Atty. Michael Poa nga wala sila nagbabag sa pagpagawas sa mga dokumento, apan gusto lamang nila nga ang tanang proseso magpabiling subay sa Konstitusyon ug sa rule of law.
