Gipatuman karung , Hulyo 14, 2026 ang bag-ong price adjustment sa produktong petrolyo, diin misaka ang presyo sa diesel ug kerosene, samtang posibleng walay kausaban o adunay gamayng lihok sa presyo sa gasolina, sumala sa Department of Energy (DOE).
Sumala pa sa DOE, misaka og ₱2.62 hangtod ₱4.62 matag litro ang presyo sa diesel, samtang ang kerosene adunay dugang-presyo nga ₱2.22 hangtod ₱4.22 matag litro. Samtang, ang gasolina mahimong magpabiling pareho ang presyo o posibleng makasinati og rollback hangtod ₱1.00 matag litro o pagtaas usab hangtod ₱1.00 matag litro.
Dugang pa niini, gipatin-aw sa ahensya nga mahimong magkalahi ang aktuwal nga presyo depende sa ipatuman nga adjustment sa matag kompanya sa lana. Matod pa ni Energy Secretary Sharon Garin, nalambigit sa pagtaas sa presyo sa petrolyo ang nagpadayon nga tensyon sa internasyonal nga merkado, lakip na ang hulga sa suplay sa lana tungod sa isyu sa Strait of Hormuz.
Sa pagkakaron, padayon nga gibantayan sa DOE ang lihok sa presyo sa krudo sa kalibotan aron matino ang posibleng kausaban sa sunod nga mga semana.
