Gianunsyo sa Philippine Airlines niadtong Huwebes, Oktubre 29, ang mandatoryong pagsumite og passenger attestation alang sa mga pasaherong paingon sa United States (US), isip pamatuod nga wala sila mobisita o gikan sa Democratic Republic of the Congo sulod sa miaging 21 ka adlaw sa dili pa ang ilang pagsakay sa eroplano.
Epektibo ang maong polisiya sugod Nobyembre 3, 2026, sa alas 11:59 sa gabii.Sakop niini ang mga pasaherong misulod o miagi sa maong nasud pinaagi sa kahanginan, yuta o dagat, lakip na ang mga transit passenger o mga pasaherong mihunong sa tugpahanan sa Democratic Republic of the Congo bisan wala sila mogawas sa eroplano o terminal.
Subay kini sa mando sa U.S. Centers for Disease Control and Prevention (CDC) tungod sa padayon nga pagdaghan sa mga kaso sa Ebola virus sa Congo, aron masiguro ang kaluwasan ug mapugngan ang posibleng hulga sa panglawas.
Dili tugotan nga makasulod sa US ang mga pasaherong dili makapasa sa gikinahanglang CDC attestation.Ang polisiya magamit sa tanang pasahero, bisan unsa ang ilang nasyonalidad.
Kinahanglan usab nga adunay lahi nga attestation ang matag pasahero sa matag flight.
Samtang, mahimong motubag sa porma ang ginikanan o awtorisadong tawo alang sa mga pasaherong ubos sa 18 anyos, ingon man sa mga adunay pisikal o mental nga kakulangan.
Magpabiling epektibo ang maong polisiya hangtod Disyembre 18, 2026, gawas kon bawion kini sa US CDC.
