Gihangyo ni National Bureau of Investigation (NBI) Director Melvin Matibag ang House prosecution panel nga mauna ang iyang pagtestigo sa impeachment trial ni Vice President Sara Duterte aron malikayan ang posibleng pagkalangan sa pagdungog sa kaso.
Sa iyang sulat ngadto kang lead prosecutor ug Batangas Rep. Gerville Luistro, gipahayag ni Matibag nga adunay iyang gitambongan nga summit sa mga lider sa law enforcement sa Thailand sa Hulyo 21 ug 22.
Tungod niini, nangayo kini nga makaatubang sa Senado sa dili pa ang Hulyo 20 aron dili maapektuhan ang iyang pag-apil sa maong kalihokan isip representante sa NBI.
Matud ni Matibag, personal niyang ire-representar ang NBI sa maong tigom kauban ang mga opisyal sa Federal Bureau of Investigation (FBI) ug Royal Thai Police aron hisgutan ang mga isyu kabahin sa mga scam ug transnational organized crime sa Asia-Pacific.
Gipahayag usab niini nga ang sayong pagtestigo makatabang aron magpadayon nga hapsay ang dagan sa impeachment proceedings.
Gilauman nga ang iyang testimonya maghisgot kabahin sa imbestigasyon sa NBI sa giingong pagpanghulga ni Vice President Sara Duterte batok kang Pangulong Ferdinand Marcos Jr., First Lady Liza Araneta-Marcos, ug kanhi House Speaker Martin Romualdez.
Ang maong alegasyon usa sa mga nag-unang basehan sa Articles of Impeachment nga gisang-at batok sa bise presidente.
