Gipadayag ni Jennifer, ang reklamante sa kontrobersyal nga insidente nga nalambigit sa usa ka PUJ driver sa Davao City, ang iyang kasubo human siya gibatikos sa mga netizens. Matod niya, nakadawat siya og mga mensahe nga nanghulga sa iyang kinabuhi ug sa iyang pamilya, lakip na ang mga dili maayong pahayag batok sa iyang mga babayeng anak, nga maoy hinungdan sa iyang kahadlok.
Gipasalamatan hinuon niya ang ubang pasahero sa PUJ nga misuporta sa iyang reklamo pinaagi sa pag-adto sa LTFRB aron mopamatuod sa ilang nasinati atol sa biyahe. Nahisgutan nga nagsugod ang isyu human niya i-upload ang usa ka video diin iyang gipahayag ang iyang kahadlok tungod sa giingong kusog nga pagpadagan sa drayber sa PUJ.
Gipamatud-an sa Davao City Police Office nga lehitimo ang pagdakop sa drayber base sa mga pahayag sa mga pasahero.Gipahibalo usab sa LTFRB XI nga nakapagawas na sila og show cause order batok sa operator sa PUJ ug ipatawag ang drayber ug mga reklamante alang sa panaghisgot sa insidente ug pagtino sa angay nga lakang sa maong panghitabo.
