Mihinay gamay ang Super Typhoon Inday samtang padayon kini nga naglihok paingon sa kasadpang bahin sa Philippine Sea, sumala sa Philippine Atmospheric, Geophysical and Astronomical Services Administration (PAGASA).
Gipahibalo nga sa ilang tropical cyclone bulletin alas-11:00 sa gabii anaa sa ilalom sa Signal No. 1 ang pipila ka lugar sa Luzon ug Bicol Region tungod sa posibleng kusog nga hangin nga moabot sa 39 hangtod 61 kilometro matag oras.
Lakip sa mga lugar nga anaa sa Signal No. 1 mao ang Batanes, Cagayan lakip ang Babuyan Islands, Isabela, amihanang-sidlakang bahin sa Quirino (Maddela), Apayao, amihanang bahin sa Abra, Kalinga, sidlakang bahin sa Mountain Province, sidlakang bahin sa Ifugao, Ilocos Norte, amihanang bahin sa Aurora, ug amihanan ug sentral nga bahin sa Catanduanes.
Nagpasidaan ang state weather bureau nga posible pa nga ipataas sa Signal No. 2 o Signal No. 3 ang alerto sa ubang lugar samtang nagkaduol ang bagyo.
Ulahing namonitor alas-10 sa miaging gabii ang sentro sa Super Typhoon Inday sa kapin 1,000 kilometro silangan sa Northern Luzon. Kauban niini ang kusog nga hangin nga moabot sa 185 kilometro matag oras ug paghaguros nga moabot sa 230 kilometro matag oras. Naglihok usan ang maong bagyo paingon sa kasadpang-amihanan sa gikusgon nga 20 kilometro matag oras.
Gilauman sa PAGASA nga magpabiling kusgan ang Super Typhoon Inday hangtod Huwebes sa dili pa kini anam-anam nga mohuyang samtang mogawas sa Philippine Area of Responsibility.
