Gipataas sa Philippine Atmospheric, Geophysical and Astronomical Services Administration (PAGASA) ang Tropical Cyclone Wind Signal No. 1 sa pipila ka bahin sa Cagayan tungod sa nagkaduol nga Super Typhoon Inday.
Lakip sa mga lugar nga ubos sa Signal No. 1 ang amihanan-sidlakang bahin sa Cagayan, partikular ang mga lungsod sa Santa Ana, Gonzaga, Lal-Lo, Gattaran, ug Santa Teresita.
Matud sa weather bulletin sa PAGASA, anaa pa sa gawas sa Philippine Area of Responsibility (PAR) ang bagyo apan gilauman nga mosulod kini sa nasod karong Miyerkules.
Namonitor ang sentro sa Super Typhoon Inday sa gilay-on nga mokabat sa 1,545 kilometro sidlakan sa Northern Luzon, nga adunay kusog sa hangin nga moabot sa 185 kilometro kada oras ug paghaguros nga moabot sa 230 kilometro kada oras.
Nagpadayon ang paglihok sa bagyo paingon sa kasadpan sa gikusgon nga 30 kilometro kada oras ug adunay gilapdon sa kusog nga hangin nga moabot sa 900 kilometro gikan sa sentro niini.
Gipasidan-an usab sa PAGASA ang posibleng kusog nga pag-ulan sa Batanes gikan Huwebes sa gabii hangtod Biyernes tungod sa epekto sa bagyo ug habagat.
Gipahimangnoan sa ahensya ang mga mananagat ug gagmayng sakayang pandagat nga likayan una ang paglayag, ilabi na sa mga lugar nga posibleng makasinati og delikadong kahimtang sa kadagatan.
Gilauman nga magpabiling super typhoon ang Inday hangtod Huwebes sa dili pa anam-anam nga mokunhod ang kusog ug mahimong typhoon.
