Gipakusgan sa Department of Agriculture (DA) ang pagpangandam batok sa posibleng epekto sa El Niño sa sektor sa agrikultura, sabay usab sa pasidaan nga posibleng makasinati ang nasud og grabeng kainit, kakulang sa ulan ug hulaw sa umaabot nga mga bulan.
Matud ni Agriculture Secretary Francisco Tiu Laurel Jr., padayon ang mga programa sa irigasyon aron matabangan ang mga mag-uuma nga mapadayon ang ilang produksiyon.
Gipahibalo usab sa DA nga gipalapdan na niini ang mga cold storage facility aron hapsay nga matipigan ang mga ani, maminusan ang post-harvest losses, ug dili kaayo magsalig ang nasud sa pag-angkat og mga produktong agrikultural.
Naggahin usab ang gobyerno og financial assistance alang sa mga mag-uuma nga maapektuhan sa El Niño.
Gipasabot sa DA nga kon mokunhod ang lokal nga ani tungod sa kakulang sa ulan ug hulaw, mahimong mosaka ang presyo sa mga palaliton ug modako ang panginahanglan sa imported nga mga produkto.
Una nang nagpagawas ang DA og El Niño Alert base sa mga projection sa Philippine Atmospheric, Geophysical and Astronomical Services Administration (PAGASA).
Sumala sa ahensya, adunay 79 porsiyento nga posibilidad nga maagian sa Pilipinas ang El Niño nga gilauman magsugod sa Hunyo, molungtad hangtod Agosto 2026, ug posibleng mopadayon hangtod sa unang bahin sa 2027.
Busa, nag-awhag pag-usab ang DA sa publiko nga magtipid sa paggamit og tubig aron masiguro ang igo nga suplay kung mosamot pa ang epekto sa El Niño sa umaabot nga mga bulan.
