Hisgutan una sa impeachment trial ni Vice President Sara Duterte ang mga mosyon ug opening statements sa unang adlaw sa pagtaral sa Hulyo 6, sumala pa ni House prosecutor Rep. Joel Chua. Matud pa, gipadayag ni Chua nga sa ikaduhang adlaw pa gilauman nga sugdan ang presentasyon sa mga ebidensya ug mga testigo human maresolba ang tanang pending procedural issues.
Lakip sa mga mosyong pagahisgotan ang hangyo nga tugotan ang sabayang partisipasyon sa public ug private prosecutors, ingon man ang pag-abli sa selyadong kahon sa Bureau of Internal Revenue (BIR) nga giingong naglangkob sa tax records ni Vice President Duterte ug sa iyang bana. Kahinumduman, miuyon ang depensa nga ablihan ang maong box basta himuon kini pinaagi sa executive session.
Dugang pa niini, milungtad usab ang pre-trial conference human giinsistir sa depensa nga tagsa-tagsaong markahan ang kapin 4,000 ka dokumento nga gamiton isip ebidensya sa kaso. Sa kasamtangan, gitakda nga magsugod ang impeachment trial sa Hulyo 6, ug gilauman nga molungtad kini og mga tulo ka bulan, depende kini sa dagan sa presentasyon sa ebidensya ug mga testigo.
