Mirekomenda ang Philippine National Police-Criminal Investigation and Detection Group (PNP-CIDG) sa Department of Justice (DOJ) nga pasakahan og kasong paglapas sa Anti-Hazing Act si kanhing Ateneo head coach Tab Baldwin ug 10 ka miyembro sa coaching ug support staff. Gumikan sa pagkamatay sa student-athletes nga sila Rene Clert Baterbonia ug Divine Adili atol sa team-building activity sa Dipaculao, Aurora kaniadtong Hunyo 8, 2026.
Base sa imbestigasyon sa PNP-CIDG, ang gihimong seawater training gikonsiderar nga hazing tungod kay nakahatag kini og physical pain isip rekisito aron magpabilin sa koponan ug nahimong kabahin usab sa pagpili sa final lineup sa Ateneo alang sa sunod nga UAAP season.
Gikumpirma usab sa Department of the Interior and Local Government nga ang tumong sa maong aktibidad mao ang pagsulay sa pisikal ug mental nga kahimtang sa mga atleta.
Sumala sa mga imbestigador, lima sa mga players ang niingon nga dili sila kahibalo molangoy, apan gipadayon gihapon ang water training taliwala sa high tide diin nalumos ang duha ka biktima.
Sa pagkakaron, naghulat pa ang Bombo Radyo sa pahayag gikan sa kampo ni Tab Baldwin ug sa ubang mga indibidwal nga nalambigit sa girekomendang kaso.
