Gipusil-patay ang usa ka 53-anyos nga lalaki ug nailhan isip alyas Manolo nga nagapanglimas og bulawan (gold panning) human kini giatake sa wala mailhing mga armadong suspek sa Purok 6B, Barangay Apokon, Tagum City kaniadtong hapon sa Hunyo 25, 2026.
Base sa inisyal nga imbestigasyon sa Tagum City Police Station, nagapanglimas og bulawan ang biktima uban sa iyang ka-live-in partner daplin sa Hijo River sa dihang kalit nga miabot ang duha ka wala mailhing lalaki sakay sa usa ka itom nga Honda TMX nga motorsiklo nga walay plaka ug gilayon siyang gipusil sa makadaghang higayon.
Sa pagresponde sa mga otoridad, nasuta nga adunay daghang samad pinusilan sa ulo ug lawas ang biktima nga maoy hinungdan sa iyang kamatayon.
Narekober sa mga imbestigador sa crime scene ang tulo ka basiyo ug usa ka buhing bala sa gituohang .45 caliber nga pusil.
Sumala pa sa kapulisan, usa sa ilang gitan-aw nga motibo sa krimen mao ang posible nga personal nga dumot, apan padayon pa ang imbestigasyon aron masuta ang tanang anggulo sa maong kaso.
Sa pagkakaron, gipahiluna na sa Rubio Memorial Services ang patayng lawas sa biktima.
