Nagmando ang Department of Agriculture (DA) og komprehensibong structural assessment sa General Santos Fish Port Complex human temporaryong gisirado ang pipila ka bahin sa pasilidad tungod sa epekto sa Magnitude 7.8 nga linog nga miigo niadtong Hunyo 8.
Sumala kang Agriculture Secretary Francisco Tiu Laurel Jr., gikinahanglan ang mas lawom nga inspeksyon aron hingpit nga masuta ang kahimtang sa fish port, lakip na ang geotechnical investigation ug uban pang mga pagsusi taliwala sa nagpadayon nga mga aftershock.
Dugang pa niini, sa inisyal nga inspeksyon nga gihimo niadtong Hunyo 8 ug 9, natumbok ang pipila ka kondisyon nga maoy hinungdan sa temporaryong pagsira sa Market Halls 1, 2 ug 3, samtang gilimitahan usab ang paggamit sa Market Hall 4.
Samtang niini, gipadayag ni Philippine Fisheries Development Authority Acting General Manager Glen Pangapalan nga nagpabiling structurally sound ang fish port complex base sa unang assessment nga nahuman niadtong Hunyo 18.
Lakip usab sa maayong balita nga walay natala nga namatay o naangol taliwala sa mga empleyado, negosyante ug uban pang stakeholders bisan sa kusog nga paglinog.
Apan, matod pa ni Pangapalan, importante gihapon ang mas detalyadong pagsusi aron makumpirma ang kaluwasan sa pasilidad ug matino ang posibleng mga lakang nga kinahanglan buhaton.
Sa pagkakaron, gipadali sa DA ang assessment aron masiguro ang kaluwasan sa mga tawo ug mapadayon ang operasyon sa General Santos Fish Port Complex nga usa sa labing importante nga sentro sa industriya sa tuna sa nasud.
