Mihimo og airstrike ang Estados Unidos batok sa Iran human akusahan ni U.S. President Donald Trump ang maong nasud nga maoy responsable sa pag-atake sa usa ka US helicopter sa Strait of Hormuz, nga maoy hinungdan sa paspas nga tubag-militar sa Amerika.
Sumala sa militar sa Estados Unidos, nagsugod ang operasyon alas 5:00 sa hapon sa Eastern Standard Time isip tubag sa pagkahagsa sa Apache helicopter.
Gipahayag sa Amerika nga ang ilang gihimong pag-atake usa ka “proportional response” batok sa ilang gitawag nga “walay katarungang agresyon sa Iran.”
Nasayran nga naluwas ang duha ka piloto sa helicopter pinaagi sa usa ka unmanned sea drone ug dayon gidala sa usa ka luwas nga dapit.
Matud pa ni Trump, wala maangol ang duha ka tripulante, apan iyang gipasabot nga gikinahanglan sa Estados Unidos ang pagresponde sa maong insidente.
Samtang, wala pa masuta kon tinuyo ba gayud ang pag-atake sa helicopter, sumala sa pipila ka opisyal sa Amerika.
Wala usab direktang miangkon og responsibilidad ang Iran, bisan pa man nga gikompirma sa pipila ka Iranian media nga adunay nahitabong pagkahagsa sa usa ka eroplano.
Nagkagrabe usab ang tensyon sa rehiyon human sa laing mga airstrike nga gihimo sa Israel sa habagatang Lebanon, nga nakapukaw sa kahadlok sa posibleng bag-ong panimalos gikan sa Iran.
Gipasidan-an usab ni Iranian Foreign Minister Abbas Araghchi ang mga sundalong Amerikano nga naka-deploy sa rehiyon nga dako ang posibilidad sa peligro tungod sa mga aksidente o kalit nga panagsangka.
Taliwala sa nagkagrabeng tensyon, miingon si Trump nga naglaum siya sa usa ka posibleng kasabutan alang sa ceasefire sa rehiyon, apan hangtod karon wala pay direktang kasabotan nga makapahunong sa tensyon sa Strait of Hormuz.
