Mahimong mas espesyal ang pagsaulog sa ika-60 nga Founding Anniversary sa Munisipyo sa Tarragona pinaagi sa Kasalan ng Bayan 2026 diin 60 ka mga magtiayon ang magpakasal karong Hunyo 14.
Gidapit ni Mayor Art Benjie “Kaka” Bulaong ang tanang katawhan nga mosaksi sa maong kalihokan nga nagsilbing usa na usab ka mahinungdanong timaan sa bag-o ug inklusibong liderato sa Tarragona.
Matud ni Mayor Bulaong, usa kini sa labing makahuluganon nga mga kalihokan isip kabahin sa founding anniversary sa lungsod ug sa unang Ka’aNiYogan Festival.
Nag-andam ang mayor og mga regalo alang sa mga bagong minyo lakip ang P10,000 nga cash gift, photoshoot ug wedding cake aron mahimong mas halandumon ug espesyal ang ilang dakong adlaw.
Gitabangan usab sa lokal nga panggamhanan ang 60 ka mga magtiayon sa ilang pre-wedding requirements ug uban pang dokumento.
Matud ni Bulaong, gituyo gyud nila nga 60 ka mga magtiayon ang moapil aron motakdo sa ika-60 nga tuig sa pagkatukod sa Tarragona.
Gipasiugda usab sa mayor nga ang unang Ka’aNiYogan Festival ug ang founding anniversary gipahinungod alang sa tinuod nga sentro sa kasaulogan—ang katawhan sa Tarragona.
Ang Kasalan ng Bayan 2026 usa sa mga inisyatibo ni Mayor Bulaong aron mahatagan og labing maayong serbisyo ang iyang mga lumulupyo. Pipila lamang ka adlaw ang milabay, gilunsad usab niya ang crisis intervention program sa lokal nga panggamhanan aron makatabang sa mga huyang nga sektor pinaagi sa cash relief assistance.
Andam na ang entablado alang sa usa sa labing gipaabot nga mga kalihokan sa unang Ka’aNiYogan Festival ug ika-60 nga Araw ng Tarragona—ang grand coronation night sa Bobay ng Ka’aNiYogan 2026 nga ipahigayon karong Hunyo 17 sa Plaza de Tarragona sa Tarragona, Davao Oriental.
Sumala sa mga organisador, ang maong beauty pageant labaw pa sa katahom ug tradisyon tungod kay gipunting niini ang katuyoan, pagpalig-on sa kababayen-an ug ang ilang representasyon sa komunidad.
Matud ni Mayor Art Benjie “Kaka” Bulaong, ang Bobay ng Ka’aNiYogan dili lamang pasundayag sa katahom apan usa usab ka paagi sa pagpasidungog sa mga babayeng nagpakita og kusog, pagsalig sa kaugalingon ug makahuluganon nga adbokasiya alang sa ilang komunidad.
Gipahibalo sa mga organisador nga 10 ka mga kandidata nga nagrepresentar sa ilang tagsa-tagsang barangay ang magtinigi alang sa korona, nga dili lamang magpakita sa ilang kaanyag ug grasya apan usab sa ilang kinaadman, maayong kinaiya ug garbo isip mga lumad sa Tarragona.
Ang mga kandidata naggikan sa mga barangay sa Cabagayan, Central o Poblacion, Dadong, Jovellar, Limot, Lucatan, Maganda, Ompao, Tomoaong ug Tubaon.
Niadtong Hunyo 9, gipagawas sa lokal nga panggamhanan sa Tarragona ang opisyal nga video teaser alang sa coronation night aron ipakita kung unsay mapaabot sa publiko sa maong kalihokan.
Matud sa mga organisador, “ang katahom dili lamang mahitungod sa kaanyag kondili usa ka representasyon nga adunay katuyoan, ug ang spotlight karon alang sa mga lig-on ug empowered nga kababayen-an.”
Samtang nagkadako ang kasabik sa katawhan, gidapit ang publiko nga mahimong kabahin sa pagsaulog sa empowered womanhood, lokal nga kultura ug garbo sa komunidad.
Samtang, ang presentation ug sashing sa mga kandidata ipahigayon karong Hunyo 12 diin aduna usab festival costume ug glam casual wear competitions.
