Nagpagawas og warrant of arrest ang Malolos Regional Trial Court batok kang contractor Pacifico “Curlee” Discaya, iyang asawa nga si Cezarah “Sarah” Discaya ug siyam pa ka uban may kalabotan sa kasong malversation through falsification of public documents nga giingong nalambigit sa flood control projects.
Ang maong mando gipagawas usa ka adlaw human magsang-at og mga kaso ang Office of the Ombudsman batok sa magtiayon ug sa ilang mga kaubang akusado nga sila Merg Jaron Laus, Brice Ericson Hernandez, Jaypee Mendoza, Ernesto Galang, Norberto Santos, Lorenzo Pagtalunan, Juanito Coronel Mendoza, Floralyn Simbulan ug Ma. Roma Angeline Rimando.
Sumala sa korte, walay gitakdang piyansa alang sa 11 ka mga akusado. Samtang gipahibalo ni DILG Secretary Jonvic Remulla nga gikatakdang ibalhin si Curlee Discaya ngadto sa Bulacan karong Hunyo 8.
Ang kaso may kalabotan sa rehabilitasyon sa usa ka river construction structure sa Bulusan, Calumpit, Bulacan ubos sa proyekto sa Department of Public Works and Highways.
Matud ni Assistant Ombudsman Mico Clavano, nadiskubre sa imbestigasyon ang giingong seryosong paglapas sa auditing ug accounting rules sa gobyerno, lakip ang giingong pagbayad sa dredging ug embankment works bisan kulang o walay igo nga dokumentasyon nga nagpamatuod nga nahuman ang proyekto.
Tungod niini, giingong nakabenepisyo og kapin P53.9 milyon ang St. Timothy Construction Corporation nga maoy hinungdan sa dakong kadaot sa pondo sa gobyerno. Sa pagkakaron, wala pa makapagawas og opisyal nga pahayag ang kampo sa mga akusado.
