Naluwas ang usa ka Nepali mountain guide human ma-stranded sulod sa hapit unom ka adlaw sa Mount Everest nga kulang sa oxygen, pagkaon ug maayong kapuy-an.
Giila ang lalaki nga si Dawa Sherpa nga una nang gituohang namatay human dili na makontak samtang nanaug gikan sa kinatas-ang bahin sa Mount Everest.
Apan human sa unom ka adlaw, nakit-an siyang buhi sa usa ka cleanup team samtang hinayhinay nga nanaug paingon sa Everest Base Camp. Giluwas dayon siya pinaagi sa helicopter ug gidala sa ospital sa Kathmandu aron matambalan sa dehydration, frostbite ug bali sa bukog.
Matud ni Sherpa, nahutdan siya og oxygen sa taas nga bahin sa bukid maong nalisdan siya sa paglihok. Wala usab siya makakaon sulod sa unang duha ka adlaw ug napugos sa pag-usap og yelo aron adunay mainom nga tubig. Nakatabang usab kaniya ang pipila ka tsokolate nga iyang nakit-an sa iyang bulsa aron mabuhi sa mas taas nga panahon.
Gibutyag usab niini nga nahulog siya sa usa ka lawom nga siwang sa yelo o crevasse sulod sa kapin duha ka adlaw. Apan nakagawas siya human matabonan sa yelo ang maong siwang tungod sa nahitabong avalanche.
Nahinumduman nga lima na ka tawo ang namatay sa kasamtangang climbing season sa Mount Everest. Sa kinatibuk-an, kapin 300 na ka mga mountaineer ang namatay sa maong bukid sukad pa niadtong 1920s.
