Gilabayan og mga sinako nga basura ang atubangan sa opisina sa DENR-11 sa Km. 7, Lanang, Davao City ning Biyernes. Sumala sa gwardya sa maong ahensya, natingala na lamang sila sa kalit nga pagtapok sa daghang basura sa maong lugar.
Matud pa niini, namatikdan nila kagabii ang usa ka dump truck nga miduol sa maong dapit ug gituohang maoy naglabay sa mga basura. Kahinumduman nga una nang gipadayag ni Mayor Sebastian “Baste” Duterte ang plano nga himuong usa ka collection point sa basura ang atubangan sa regional office sa DENR-11 aron makita ug masabtan sa ahensya ang gidaghanon sa basura nga matag adlaw matigom sa siyudad.
Una nang nagmando ang DENR-11 sa pagsuspenso sa operasyon sa Davao Sanitary Landfill sa Brgy. New Carmen, Tugbok District tungod sa nahitabong trash slide. Sumala sa ahensya, tumong niini nga mahatagan og panahon ang lokal nga panggamhanan sa pagpahapsay ug pagplastar sa mga lakang alang sa pagdumala sa basura sa siyudad. Sa pagkakaron, wala pa’y opisyal nga pahayag nga gipagawas ang DENR-11 bahin sa insidente.
