Gikuwestiyon ni Sen. Erwin Tulfo ang wala paghisgot sa mga ngalan nila Sen. Loren Legarda ug Sen. Mark Villar sa testimonya sa 18 ka kanhing miyembro sa Philippine Marines atol sa pagdungog sa Senate Blue Ribbon Committee kabahin sa giingong mga anomalya sa flood control projects.
Matud ni Tulfo, nalakip kuno sa mga unang affidavit sa mga kanhing Marines ang mga ngalan nila Legarda ug Villar apan wala kini mabalik sa aktuwal nga pagdungog sa Senado. Giingon niini nga sila lamang ni Senate President Vicente “Tito” Sotto III ang gihisgutan sa mga testigo may kalabotan sa alegasyon sa pagdawat og maleta nga adunay kuwarta.
Mariing gihimakak nila ni Sen. Sotto ang maong pasangil. Subay niini, gikuwestiyon usab ni Tulfo ang nahitabong pagdungog sa laing Blue Ribbon panel nga gipangulohan ni Sen. Pia Cayetano ug gihulagway niya kini nga usa ka “one-sided” nga hearing.
Dugang pa niini, gipahibalo ni Tulfo nga iyang ipatawag pag-usab ang mga kanhing Marines sa iyang komite sa Hunyo 8 aron pangutan-on ang mga isyu ug detalye nga wala kuno matubag sa naunang pagdungog.
Matud pa sa senador, gusto niyang masayran nganong wala na mahisgoti sa testimonya ang mga ngalan nila Sen. Legarda ug Sen. Villar bisan pa man nga nalakip kuno kini sa mga unang affidavit sa mga testigo. Samtang sa pagkakaron, padayon pang gihulat ang pahayag gikan sa duha ka mga senador kabahin sa maong isyu.
