Nagkaabot og kasabotan ang Israel ug Hezbollah sa pagpasig-uli sa ceasefire o tigil-putukan taliwala sa mga paglapas nga natala sa naunang kasabotan.
Ang bag-ong kasabotan nahimo pinaagi sa pagpamagitan sa Estados Unidos ug naglangkob og hugot nga mga kondisyon alang sa duha ka panig. Lakip niini ang pagbalhin sa mga pwersa sa Hezbollah ngadto sa amihanang bahin sa Litani River nga mga 30 kilometro ang gilay-on gikan sa utlanan sa Israel.
Subay usab sa kasabotan, hinay-hinay nga ibalik sa Israel ang ilang mga tropa gikan sa southern Lebanon padulong sa ilang mga posisyon duol sa border. Samtang ang Lebanese Armed Forces ug mga tropa sa United Nations peacekeeping force lamang ang tugotan nga mopuwesto sa buffer zone sa habagatang bahin sa Litani River.
Bisan pa sa maong kasabotan, mipadayag ang Israel nga magpabilin ang ilang katungod sa paglihok batok sa Hezbollah kon adunay mahitabo nga paglapas sa ceasefire o mga plano sa pag-atake.
Tungod sa pagpatuman sa tigil-putukan, liboan ka mga residente nga kaniadtong milayas tungod sa kagubot ang nakabalik na sa ilang mga panimalay sa southern Lebanon. Apan nagpabilin nga marupok ang sitwasyon human adunay mga report sa pinusilay ug drone attacks nga natala bisan pa sa pagpatuman sa ceasefire.
