Dili moubos sa 46 ka tawo ang namatay samtang kapin 70 ang nasamdan human sa usa ka kusog nga pagbuto sa Namhkam Township sa amihanang bahin sa Myanmar niadtong Domingo.
Sumala sa mga rescuer, lakip sa mga namatay ang mga kabataan, samtang nagpadayon pa ang pag-atiman sa mga nasamdan. Aduna usab laing report nga nag-ingon nga mikabat sa 59 ang kinatibuk-ang ihap sa mga namatay sa maong insidente.
Gipadayag sa Ta’ang National Liberation Army (TNLA) nga ang pagbuto gituohang resulta sa aksidenteng pagdetonar sa mga gitipig nga pampasabog nga gigamit sa pagmimina ug quarrying.
Sa pagkakaron, padayon pa ang imbestigasyon aron matino ang eksaktong hinungdan sa insidente ug unsaon pagkahitabo sa maong pagbuto.
Nahitabo ang insidente taliwala sa nagpadayong kagubot sa Myanmar nga anaa gihapon sa taliwala sa civil war sukad makuha sa militar ang gahum niadtong 2021.
