Misaka ang employment sa tibuok Davao Region base sa preliminary results sa 2025 Labor Force Survey sa Philippine Statistics Authority, bisan pa nga ang Davao City nakarekord gihapon sa pinakataas nga unemployment rate sa rehiyon.
Nadugangan og gibana-banang 86 mil ka empleyado ang rehiyon karong tuiga, diin misaka ang total employment ngadto sa 2.48 million gikan sa 2.39 million sa miaging tuig.
Mipabilin nga pinakadako nga tinubdan sa trabaho ang serbisyo nga sektor nga adunay 1.39 million ka trabahante o 56.4% sa total employment.
Gisundan kini sa agrikultura nga adunay 694 mil ka trabahante samtang ang industriya adunay 385 mil.
Misaka usab ang trabaho sa agrikultura nga midugang og 35 mil ka empleyado, nga giingong resulta sa pag-uswag sa crop production, agribusiness, fisheries, ug mga programa sa gobyerno aron mapalig-on ang food production ug panginabuhian sa mga mag-uuma ug mangingisda.
Gipadayag sa Department of Labor and Employment Region XI nga ang pagsaka sa employment nagpakita sa padayon nga recovery ug pag-stabilize sa agricultural activities sa rehiyon.
Nakarekord ang Davao City sa pinakataas nga unemployment rate nga 3.8%, samtang ang Davao del Sur adunay pinakubos nga unemployment rate nga 1.5%.
Miubos usab ang unemployment rate sa tibuok rehiyon ngadto sa 2.9% gikan sa 3.2% niadtong 2024, samtang misaka ang labor force participation rate ngadto sa 65.4% o 2.55 million ka tawo nga aktibong nagtrabaho o nangita og trabaho.
Mipabilin ang wholesale ug retail trade isip pinakadako nga employer sa serbisyo, gisundan sa transportation and storage ug public administration and defense.
Miubos hinuon ang employment sa transportation and storage nga nawad-an og pito ka libo ka trabahante, samtang miubos usab og upat ka libo ka trabahante ang accommodation ug food service activities.
Gipasiugda sa Department of Labor and Employment Region XI ang panginahanglan nga padayon nga palig-onon ang job generation programs, skills training, ug productivity sa agrikultura aron mapadayon ang lig-on nga employment growth sa rehiyon, ilabi na alang sa kababayen-an, kabatan-onan, ug vulnerable sectors sa katilingban.
