Nanawagan si Vice President Sara Duterte-Carpio sa mga bag-ong opisyal nga magpabiling adunay integridad ug kaisog sa ilang serbisyo, kini ang gipagawas nga pamahayag dungan sa graduation sa Philippine Military Academy “Talang Dangal” Class of 2026 sa Fort Del Pilar sa Baguio City.
Gihisgutan niini nga ang ilang pagbansay naghatag kanila og pundasyon sa disiplina ug sakripisyo nga kinahanglan gamiton sa pagpanalipod sa nasud.
Giawhag usab niya ang mga kadete nga mahimong ehemplo sa dungog ug dignidad ug magpabiling lig-on batok sa bisan unsang hulga sa soberanya sa Pilipinas.
Nagpasalamat usab siya sa ilang pagpili sa dalan sa military service nga iyang gihulagway nga dungganon ug nakapokus sa kaayohan sa mga Pilipino.
Dugang pa ni Duterte, ang ilang serbisyo maoy pamatuod sa determinasyon sa pagpanalipod sa nasud ug sa kagawasan sa katawhan.
Sa katapusan, iyang gipangumusta ug gidayeg ang mga migradwar ug ilang pamilya isip kabahin sa bag-ong henerasyon sa mga tigpanalipod sa nasud.
