Gipasalig ni Pangulong Ferdinand Marcos Jr. nga walay bisan unsang pwersa sa gobyerno nga nalambigit sa natala nga sunod-sunod nga pagpamusil sulod sa Senado kagabii.
Subay sa pamahayag sa Pangulo, dayon siyang nakigkoordinar kang DILG Secretary Jonvic Remulla aron maadto-an dayon ang maong lugar ug masiguro ang kahimtang sa seguridad.
Dugang pa sa Pangulo, nakig-estorya usab siya kang NBI Director Melvin Matibag aron mamatud-an kon adunay mga operatiba sa ahensya nga misulod sa Senado, apan gilayon kining gipanghimakak sa NBI.
Sumala pa kang PBBM, lakip sa mga lehitimong security forces nga anaa sulod sa Senado mao ang mga miyembro sa Philippine National Police, Philippine Marines ug Office of the Senate Sergeant-at-Arms o OSAA.
Sa laing bahin, gipanghimakak usab sa Pangulo nga adunay gimando nga pagdakop batok kang Senador Ronald dela Rosa
Sa kasamtangan, padayon ang imbestigasyon sa mga otoridad pinaagi sa pagrepaso sa mga CCTV footage aron mailhan kon kinsa gyud ang responsable sa kagubot nga nahitabo sulod sa Senado.
Sa pagkakaron, nanawagan si Pangulong Marcos sa publiko nga magpabiling kalmado samtang nagpadayon ang imbestigasyon sa Senado ug sa PNP aron masuta ang tibuok kamatuoran sa insidente.
