Gipasalig sa Palasyo nga ilang tahuron ang proseso sa hustisya ug ang bisan unsang desisyon sa hukuman, kasunod sa pagpasaka og reklamo ni Atty. Manases Carpio, asawa ni Vice President Sara Duterte.
Matod ni Palace Press Officer Claire Castro, pasagdan na lamang sa Palasyo ang Supreme Court of the Philippines ug mga hukom sa pagdesisyon kung mopadayon ba o i-dismiss ang maong reklamo, subay sa naglungtad nga proseso sa balaod.
Gipasaka ni Manases Carpio ang reklamo niadtong alas 10:00 sa buntag, Abril 27, 2026, sa Quezon City Prosecutor’s Office.Target sa reklamo sila BSP Governor Eli Remolona Jr.,, AMLC Director Ronel Buenaventura ug pipila ka miyembro sa House Committee on Justice.
Gipasabot sa Palasyo nga ang korte lamang ang adunay katungod sa pagsusi ug paghusga kung lig-on ba o walay basihan ang mga alegasyon nga gipasaka. Dugang pa ni Castro, importante nga sundon ang hustong proseso aron masiguro ang patas nga pagpatuman sa balaod.
Giapil usab sa Palasyo ang panawagan sa publiko nga respetohon ang legal nga proseso ug likayan ang paghatag dayon og konklusyon, samtang wala pa’y pinal nga desisyon ang hukuman, aron mapadayon ang kahapsay ug pagsalig sa sistema sa hustisya sa nasud.
