Gibulabog sa sunod-sunod nga pag-atake sa mga armadong grupo ang Bamako sa Mali, diin gilusob sa mga armadong grupo ang usa ka nag-unang military base nga nahimutang gawas sa kapital.
Sumala pa sa mga otoridad, dayong gipakatap ang mga sundalo sa kadalanan aron pugngan ang mga armadong grupo ug mapugngan ang pagkuyanap sa kagubot. Lakip sa mga lugar nga nakaangkon usab og pag-atake mao ang Gao, Kidal ug Sévaré.
Subay sa inisyal nga report, giila kini nga usa sa pinakadakong pag-atake nga gihimo sa mga armadong grupo sa nasud. Dugang pa niini, gituohang anaa sa likod sa maong insidente ang Azawad Liberation Front ug Jama’at Nusrat al-Islam wal-Muslimin.
Sa pagkakaron, padayon ang mainiton nga komprontasyon tali sa mga sundalo ug sa mga armadong grupo. Sa kasamtangan, gipahugtan usab ang seguridad sa nagkalain-laing lugar aron malikayan ang dugang pang pag-atake.
