Gisupak sa National Citizens’ Movement for Free Elections (NAMFREL) ang sugyot nga ipadaplin pag-usab ang Barangay ug Sangguniang Kabataan (BSKE) elections nga nakatakdang ipahigayon sa Nobyembre 2, aron kuno i-realign ang pondo aron matubag ang nagpadayon nga krisis sa lana.
Sa usa ka pahayag, gibutyag sa election watchdog nga ang pag-postpone sa local elections nagpakita og seryosong hulga sa pundasyon sa demokrasya sa nasud, busa kinahanglan dayon kini nga ibasura.
Matud sa NAMFREL, ang BSKE dili usa ka “discretionary event” o opsyonal nga kalihokan nga pwede lang ipalangan.
Kini usa ka obligasyon sa Konstitusyon ug demokratikong katungod sa katawhang Pilipino.
Gibutyag pa sa grupo nga ang pag-divert sa pondo alang sa election ngadto sa ubang serbisyo sa gobyerno usa ka klarong “institutional sabotage.”
Ang pagtangtang sa resources sa Commission on Elections (COMELEC) aron mapugngan ang eleksyon, sumala sa NAMFREL, usa ka klarong paglapas sa Article VI, Section 25(5) sa Konstitusyon nga nagdili sa pagbalhin sa budgetary funds.
Gibutyag usab nila nga delikado kini nga precedent nga makapahuyang sa independensya sa electoral body ug posibleng maghatag og gahum sa ehekutibo nga molapas sa hurisdiksyon sa COMELEC.
Sa katapusan, gibutyag sa NAMFREL nga ang matag botante adunay katungod nga mopili sa ilahang barangay ug SK officials sa tukmang panahon ug walay pagkalangan.
