Gihatagan og medical services ug psychosocial support sa Department of Health ang mga residenteng naapektuhan sa sunog sa Navotas landfill sumala sa ahensya.
Sa usa ka pahayag, gipahibalo nga mibisita si Health Secretary Ted Herbosa sa evacuation center sa Obando, Bulacan niadtong Biyernes, diin temporaryong nagpuyo ang mga mibakwit nga residente. Sumala pa sa DOH, kadaghanan sa mga evacuees gusto na unta makabalik sa ilang mga balay, apan gipahimangnoan sila batok sa peligro sa kahimsog tungod sa haze nga gikan sa sunog.
Sa iyang pagbisita, gipatin-aw ni Sec. Herbosa nga delikado sa kahimsog ang epekto sa haze, busa giawhag ang mga residente nga magpabilin una sa luwas nga lugar hangtod molambo ang kondisyon sa hangin. Sa kasamtangan, ang mga residente nga nagpabilin duol sa landfill gihatagan og medical services sama sa blood tests ug libre nga konsultasyon.
Padayon usab ang koordinasyon sa DOH uban sa mga lokal nga gobyerno ug ubang ahensya sa gobyerno aron matubag ang panginahanglan sa mga apektadong pamilya.Matud sa report, ang dakong sunog sa landfill nagsugod niadtong Abril 10 nga miresulta sa pagdaot sa kalidad sa hangin sa pipila ka parte sa Metro Manila.
