Miulbo ang dakong sunog sa munisipalidad sa Compostela, Davao de Oro kagahapon sa hapon nga miresulta sa pagkaugdaw sa usa ka lodging house ug lain pang mga istruktura.
Sa inisyal nga taho sa mga otoridad, nahitabo ang sunog sa Purok 3 Osmeña, nga mikuyanap pa sa sikbit nga mga panimalay.
Subay sa imbistigasyon sa kabomberohan, lakip sa nasunog ang De Oro lodge ug tulo ka mga panimalay.
Sumala pa sa mga residente, adunay nadunggan niini nga pagbusikad sa likod sa lodging house ug gilayon nga miulbo ang kalayo.
Gumikan sa mga light materials, paspas nga mikuyanap ang kalayo nga miresulta sa pagkaugdaw niini. Hinuon walay natala nga casualty sa maong insidente.
Mokabat usab sa 900 milyon ang kantidad sa danyos atol sa maong panghitabo.
Milusad na og imbestigasyon ang mga kabomberohan sa maong munisipalidad aron masuta ang tinuod nga hinungdan sa sunog.
Kahinumduman nga niadtong Marso 31, pasado alas Nuybi sa buntag pipila usab ka mga business establishments ang nasunog sa Purok 3, Poblacion, Compostela, Davao de Oro.
Tungod niini nagpahimangno karon ang mga otoridad sa padayon nga pag-igmat sa matag panimalay aron makalikay sa sunog.
