Gipahibalo ni US Pres. Donald Trump nga iyaha unang “suspindihon” sulod sa duha ka semana ang opensiba batok sa Iran, basta mosugot ang maong nasud nga abrihan ang Strait of Hormuz.
Sa iyang post sa Truth Social, gibutyag ni Trump nga nakaistorya niya si Pakistani Prime Minister Shehbaz Sharif ug Field Marshal Asim Munir, nga mi-resulta sa usa ka gitawag niyang “double-sided ceasefire.”
Matod pa ni Trump, nakab-ot na sa Estados Unidos ang ilahang mga target militar ug duol na sa pinal nga kasabutan alang sa malungtarong kalinaw sa Iran ug sa tibuok Middle East.
Gipadayag usab niya nga nakadawat sila og napulo ka punto nga proposal gikan sa Iran nga mahimo nang basehan sa negosasyon.
Dugang niya, halos tanan sa mga nagkalain-laing isyu nga kaniadto nagpasamot sa tensyon tali sa US ug Iran, nasabtan na, ug ang duha ka semana nga lugway gamiton aron mapinal ug mapirmahan ang kasabutan.
Nagpasalig si Trump nga kini nga lakang usa ka dakong duol sa pagsulbad sa dugay nang problema sa rehiyon ug pagpalig-on alang sa kalinaw.
