Misalmot ang mga personahe sa 10th Infantry (Agila) Division sa 1st Quarter National Simultaneous Earthquake Drill nga gipahigayon sa Camp General Manuel T. Yan Sr. niadtong Marso 12, 2026.
Sa maong kalihukan, gipresenta nga aduna sumala pa’y usa ka magnitude 7.2 nga linog nga nakahimo og kusog nga pagtay-og sa Mawab ug kunohay nakadaut sa pipila ka pasilidad sa kampo.
Ang mga sundalo ug sibilyan nga empleyado dali nga mipatuman sa standard safety procedure nga “Duck, Cover, and Hold.” Duha ka emergency scenarios ang gipahigayon aron masulayan ang kaandam sa pagtubag sa emerhensiya.
Ang unang senaryo nagpakita sa kunohay nga pagkaguba sa usa ka istruktura sa kampo nga nagresulta sa pagkabutang sa piligro sa mga biktima, hinungdan nga gilayon usab nga gipadala ang search and rescue teams ug mga medical responders.
Ang ikaduhang senaryo nagpakita sa kunohay nga electrical explosion nga miresulta og sunog sa laing bahin sa kampo.
Ang mga emergency responders dali nga nagpahigayon og fire suppression, evacuation, ug casualty rescue operations. Sumala kang Major General Alvin Luzon, importante kaayo ang kahimtang sa kaandam.
Matud pa niya, ang kaandam mao ang usa ka responsibilidad sa tanan pinaagi sa padayon nga training ug drills, masiguro niini nga andam kanunay ang mga kasundaluhan sa pagpanalipod sa kinabuhi ug epektibong pagtubag sa panahon sa kalamidad.
Ang praktikal nga drill nakapalig-on sa koordinasyon sa disaster response ug nagsiguro sa kaandam sa mga personahe aron epektibong makatubag sa nagkalain-laing emerhensiya.
