Nagduso og petisyon aron makapyansa ang kontratista nga si Sarah Discaya ug si Roma Rimando, executive officer sa St. Timothy Construction, kabahin sa kasong malversation of public funds nga walay girekomenda nga piyansa.
Ang St. Timothy Construction, nga gipanag-iyahan usab sa pamilyang Discaya, mao ang ikatulo sa listahan sa mga kontratista nga gituohang nakapangurakot og binilyon nga kantidad sa mga proyekto sa flood control sa gobyerno.
Gikumpirma ni Atty. Cornelio Samaniego nga naduso na ang petition for bail sa Lapu-Lapu City Regional Trial Court (RTC) Branch 27.
Kahinumduman nga una nang gikasuhan sa Office of the Ombudsman si Discaya ug uban pa sa kasong malversation ug graft nga adunay kalabotan sa P96.5 milyon nga ghost flood control project sa Davao Occidental.
Susamang nagplead og not guilty sila Discaya ug Rimando sa mga kasong gipasaka batok kanila.
Sa karon, kasamtangang nadetine sa Lapu-Lapu City Jail ang mga nahisgutan.
