Mikunhod og 16 ang kriminal nga insidente sa Davao City niadtong Enero, sumala sa report ni Capt. Hazel Caballero, spokesperson sa Davao City Police Office (DCPO). Bisan pa man niini, napansin ang pagsaka sa kaso sa shoplifting tungod sa bag-ong polisiya nga diretsong pasakaan og kaso ang mga suspetsado imbis nga multa o settlement lang ang ihatag.
Matud ni Caballero, ang pinakadaghan nga krimen sa siyudad mao ang theft, samtang lakip usab sa gi-monitor ang tulis ug rape. Aron masiguro ang tukmang pagreport, nakigtagbo ang kapulisan sa mga tagdumala sa mall ug security guards aron ang tanang insidente sa shoplifting mahimong ma-record ug mapasakaan dayon og pormal nga reklamo.
Daghang nadakpan sa maong mga krimen dili residente sa Davao City ug nagalihok sa nagkalain-laing establisyemento sa siyudad. Gi-awhag sa DCPO ang publiko nga dayong magpa-blotter sa tanang insidente sa snatching ug uban pang krimen aron matabangan ang kapulisan sa pag-monitor sa crime-prone areas ug pagdugang sa police visibility.
Gipasabot ni Caballero nga pinaagi sa husto ug tuloy-tuloy nga pagreport, mas dali matutukan ang mga lugar nga nagkinahanglan og dugang nga patrolya, ug mapugngan ang krimen samtang mapadayon ang kahapsay ug seguridad sa Davao City.
