Gipahugtan sa City Health Office ang pagpatuman sa sanitary permit isip mandatory nga rekisito alang sa tanang business establishments nga naglihok sulod sa syudad.
Matod sa CHO, dili na mahimong palabi-labion ang pagkuha sa sanitary permit kay kini kabahin na sa regular nga business permit renewal ug magkinahanglan og aktuwal nga inspeksyon gikan sa mga sanitation inspectors aron masiguro ang kaluwasan sa publiko.
Gipasiugda sa buhatan nga ang matag establisemento kinahanglan mosunod sa mga batakang pamalaod sa kalimpyo lakip ang husto nga pest control, regular nga water testing, ug pag-angkon og balido nga health card sa tanang empleyado. Mas hugot ang pagbantay ilabi na sa mga negosyo nga may kalabotan sa pagkaon tungod sa direktang epekto niini sa kahimsog sa katawhan.
Sumala kang Jinolex Conve C. Caingles, Sanitation Inspector III sa CHO, ang pagsunod sa sanitation standards dili lamang pormalidad kundili usa ka responsibilidad sa mga negosyante aron malikayan ang pagkaylap sa sakit ug posibleng reklamo gikan sa konsumidor.
Mipahinumdom usab ang CHO nga ang mga establisemento nga magpadayon sa paglapas sa mga regulasyon bisan pa sa mga pahimangno mahimong marekomendaran sa mas seryosong silot sama sa revocation sa permit o temporaryo ug permanente nga pagsirado sa operasyon.
Ang maong lakang sa City Health Office giila nga kabahin sa mas lapad nga paningkamot sa lokal nga kagamhanan sa pagpanalipod sa kahimsog sa publiko ug pagmintinar sa hapsay, limpyo, ug luwas nga palibot sa syudad.
