Gilusad sa City Government of Davao, kauban ang pribadong sektor nga NCCC Cares, ang usa ka scholarship program nga tumong molapad sa kahigayonan sa edukasyon alang sa mga estudyanteng Moro ug Indigenous Peoples (IP) sa dakbayan.
Gibutyag nga ang inisyatiba, nga ginganlan og NCCC Cares Scholarship Program, opisyal nga gipahigayon atol sa usa ka seremonyas sa NCCC Mall, Davao City, diin gipirmahan ang Memorandum of Agreement tali ni Mayor Sebastian “Baste” Duterte ug NCCC President Lafayette A. Lim. Ang maong kasabutan nagtimaan sa panaghiusa sa lokal nga pangagamhanan ug pribadong sektor sa pagpalig-on sa inclusive education.
Sumala sa mga organizer, ang scholarship program gitumong aron suportahan ang mga kabatan-onan gikan sa marginalized sectors, ilabi na ang Moro ug IP communities, nga kasagaran makasinati og kakulang sa access sa taas nga edukasyon tungod sa kahimtang sa kinabuhi.
Sa unang hugna sa programa, 17 ka mga estudyante ang napili nga mahimong benepisyaryo. Ang matag scholar makadawat og full scholarship nga naglakip sa bayad sa tuition ug allowance, aron matabangan sila sa ilang adlaw-adlaw nga panginahanglan samtang nag-eskwela.
Gipaabot sa City Government ug NCCC nga ang maong programa dili lamang maghatag og pinansyal nga tabang, kundili mag-abli usab og mas lapad nga oportunidad alang sa mga kabatan-onan nga mahimong aktibong kabahin sa kalamboan sa Davao City. Gilauman nga mapadayon ug mapalapdan pa kini nga scholarship program sa umaabot aron mas daghan pang estudyante ang makabenepisyo.
