Gipahayag sa Department of Health (DOH) nga andam ang Pilipinas sa pag-atubang sa Nipah virus, usa ka sakit nga matud pa sa ahensya dili na bag-o sa nasud ug dugay nang ginamonitor sa mga health authorities.
Sumala kang DOH spokesperson Assistant Secretary Albert Domingo, unang naitala ang Nipah virus sa Pilipinas niadtong 2014 sa Sultan Kudarat, diin adunay 17 ka kaso nga nadokumento. Human niini, gipahugtan sa DOH ang surveillance ug monitoring pinaagi sa Epidemiology Bureau aron masubaybayan ang posibleng pagbalik o pagkatap sa maong sakit.
Gipasabot sa opisyal nga ang Nipah virus mahimong magpakita og mga simtomas sama sa flu-like illness, hilanat, ug sa mas grabeng kahimtang, mahimong mosangpot sa pamamaga sa utok ug meningitis. Bisan pa niini, gipasiugda sa DOH nga wala nay naitalang bag-ong kaso sa nasud sukad pa sa unang outbreak kaniadtong 2014.
Gisulti usab nga ang virus mahimong makuha pinaagi sa pagkaon og kontaminadong pagkaon sama sa karne sa kabayo, o pinaagi sa suod nga pakig-uban sa usa ka tawo nga adunay dala sa maong sakit. Tungod niini, padayon ang panawagan sa DOH sa kahinlo, hustong pag-andam sa pagkaon, ug maampingong pag-atiman sa panglawas.
Sa laing bahin, gipahinumdoman sa World Health Organization (WHO) nga ang Nipah virus usa ka zoonotic disease, buot ipasabot, sakit nga mahimong motapot gikan sa hayop paingon sa tawo. Matud sa WHO, adunay pipila ka species sa paniki nga makita sa Pilipinas nga giila nga “at risk” carriers sa virus, hinungdan nga padayon ang pagbantay sa kahimtang sa palibot ug sa panglawas sa publiko.
Gipaniguro sa DOH nga ang kahimtang karon kontrolado ug walay hinungdan sa kalisang, apan nanawagan gihapon kini sa katawhan nga magpabiling alerto ug motuo lamang sa opisyal nga impormasyon gikan sa gobyerno ug health authorities.
