Sikop sa kapulisan ang duha ka mga suspek sa tulis human sa usa ka hot pursuit operation pasado alas 2:00 sa kadlawon kagahapong adlawa Enero 21, 2026 sa Lower Madapo,Bangkerohan, Brgy. 5-A, Davao City.
Giila ang mga nadakpan nga sila alyas Ricky, 21 anyos, walay trabaho, ug alyas Ernesto , 42 anyos, usa ka tricycle driver, nga gituohang nalambigit sa tulis nga nahitabo sa Green Coffee daplin sa J.P. Laurel Avenue, Brgy. R. Castillo, Davao City.
Gipahigayon sa mga personahe sa Bajada Police Station, uban ang DCPO–Criminal Investigation Unit (CIU), ang operasyon human sa follow-up investigation nga naglakip sa CCTV review ug pagpangutana sa mga testigo, diin usa ka witness ang positibong nakaila sa mga suspek ug sa ilang gigamit nga sakyanan.
Gidakop sa kapulisan ang mga suspek sa maong lugar base sa impormasyong nakuha, nga misangpot sa ilang pagkasikop.
Nasakmit gikan sa ilahang kaugalingon ang mosunod: usa (1) ka yellow Maxima/Bajaj three-wheeler motorcycle nga gigamit isip getaway vehicle; usa (1) ka .38 caliber revolver nga may sulod duha ka live ammunition; ug usa (1) ka sling bag.
Gikumpirma usab sa kapulisan nga positibong giila sa testigo ang Bajaj motorcycle nga gigamit sa paghimo sa krimen.
Sa karon giandam ang mga papeles alang sa pagpasaka sa kaso sa robbery ug paglapas sa Republic Act 10591 o ang Comprehensive Firearms and Ammunition Regulation Act, ug alang sa summary inquest proceedings.
