Gilimod ni kanhi Philippine National Police (PNP) chief Gen. Nicolas Torre III kagahapong adlawa nga siya nangayo og optional retirement, ug mibutyag nga aduna siyay mga pangutana kabahin sa giingong mando nga nagpakita nga siya kuno nangayo og sayong pagretiro.
Matod pa ni Torre, ang optional retirement usa ka butang nga ginapangayo, ug wala siya naghimo niini nga lakang.
Kahinumduman nga si Torre nahimong sentro sa balita human siya nanguna sa pagdakop sa kanhi Pangulong Rodrigo Duterte ug sa pag-aresto sa giakusahan nga child abuser nga si Pastor Apollo Quiboloy.
Bisan paman niini, gipahawa siya sa iyang pwesto isip PNP chief niadtong Agosto, halos tulo pa lamang ka bulan sukad siya nagdumala sa kapulisan sa nasud.
Sumala kang Interior and Local Government Secretary Jonvic Remulla, gipahawa si Torre human wala sumala pa niya gisunod ang usa ka resolusyon sa Napolcom nga nagbabag sa iyang mando sa reassignment sa pipila ka mga opisyal sa PNP, lakip na ang iyahang gisundan karon nga si PLt. Gen. Jose Melencio Nartatez Jr.
Sumala sa usa ka PNP resolution, ang optional retirement ni Torre gikan sa PNP service nagsugod og bisa niadtong Disyembre 26, 2025, human siya mitrabaho isip general manager sa Metropolitan Manila Development Authority (MMDA).
Makadawat si Torre og longevity pay ug retirement benefits nga tugbang sa iyahaang kasamtangang ranggo, subay sa Napolcom Resolution No. 2026-0029 nga gipagawas niadtong Enero 19, 2026.
Tungod sa pagretiro ni Torre gikan sa PNP, gilauman nga pormal nga itudlo si PLt. Gen. Jose Melencio Nartatez Jr. isip sunod nga PNP chief, ug isaka ang ranggo ngadto sa four-star general.
