Gipahayag ni kanhi Bayan Muna Representative ug abogado nga si Atty. Carlos Isagani Zarate nga ang nagpasaka sa impeachment complaint batok kang Pangulong Ferdinand Marcos Jr.—si Atty. Andre De Jesus—kanhi mismong abogado sa First Lady nga si Liza Araneta-Marcos, usa ka detalye nga nakapukaw og daghang pangutana sa politika ug legal nga han-ay.
Matod kang Zarate, makalibog ang kahimtangan tungod kay adunay miaging propesyonal nga relasyon tali ni De Jesus ug sa pamilya sa Presidente. Giingon niya nga natural lang nga mangutana ang publiko kung unsa ang motibo sa pagpasaka sa reklamo, ilabi na nga adunay “pinagsamahan” ang maong mga persona sa miaging mga tuig.
Gipasiugda usab ni Zarate nga sa hustong proseso, ang impeachment complaint kinahanglan una nga tukion sa House of Representatives. Didto pa masuta kung adunay igo nga basihanan aron ipasa ang kaso ngadto sa Senado nga maoy mopadayon sa trial kung maaprubahan.
Iyang gihisgutan ang gitawag nga “one-year bar rule,” nga nagpasabot nga kon adunay usa ka impeachment complaint nga nakabinbin batok sa usa ka impeachable official, dili na mahimong mosunod pa ang laing reklamo sulod sa parehas nga tuig. Tungod niini, daghan kuno ang nagtan-aw nga hinay o kulang sa lig-on nga legal nga pundasyon ang kasamtangang reklamo batok sa Presidente.
Bisan pa niini, giingon ni Zarate nga adunay laing impeachment complaint nga gilauman nga ipasaka sa umaabot, nga magagikan sa civil society organizations ug peoples organizations. Posible usab, matod pa niya, nga suportahan kini sa Makabayan Bloc kon makita nga lig-on ug adunay klarong basihanan sa balaod.
Apan klaro ang iyang posisyon nga dili siya mosuporta sa paggamit sa isyu sa pagdala kang kanhi Pangulong Rodrigo Duterte ngadto sa International Criminal Court isip usa sa basihan sa impeachment. Sumala kang Zarate, ang mga lakang ni Pangulong Marcos may kalabutan sa ICC naa kuno sulod sa balangkas sa Konstitusyon, ug dili angay gamiton isip pundasyon sa pagpahawa sa Presidente.
Padayon karon ang diskurso sa politika ug legal nga komunidad mahitungod sa impeachment moves batok kang Pangulong Marcos Jr., samtang ginabuhat sa Kongreso ang ilang papel sa pag-usisa kon ang maong mga reklamo angay bang ipadayun o dili.
