Makadawat og 200 porsyento o double pay ang mga empleyado sa pribadong sektor nga mo trabaho sa Disyembre 25, Adlaw sa Pasko, sumala sa Department of Labor and Employment (DOLE).
Base sa Labor Advisory No. 17 nga gipirmahan ni DOLE Secretary Bienvenido Laguesma, ang mga empleyado nga motrabaho sa regular holiday adunay katungod nga makadawat og dobleng sweldo alang sa unang walo ka oras sa trabaho.
Gidugang sa DOLE nga kung molapas sa walo ka oras ang trabaho niining adlawa, adunay dugang 30 porsyento sa hourly rate ang empleyado.
Kung ang Adlaw sa Pasko moigo usab sa rest day sa trabahante, adunay dugang pa nga 30 porsyento sa 200 porsyento nga basic wage.
Mas taas pa ang bayad kung adunay overtime sa ingon niini nga sitwasyon.
Samtang, ang mga empleyado nga dili mo trabaho sa Disyembre 25 makadawat gihapon og 100 porsyento sa ilang sweldo, basta mo trabaho sila o naka-leave nga bayad sa adlaw sa wala pa ang holiday.
Ang Disyembre 25 ginadeklara nga regular holiday matag tuig aron hatagan ang mga Pilipino og higayon nga selebrasyon sa pagkatawo ni Hesukristo uban sa pamilya ug mga mahal sa kinabuhi.
