Gipalawman sa National Bureau of Investigation sa Davao Region (NBI-XI) ang imbestigasyon sa pagpusil-patay kang Brgy. Tres de Mayo Kapitan Oscar “Dodong” Bucol Jr. samtang nag-live sa Facebook sa gawas sa iyang balay niadtong Nobyembre 25, 2025.
Apil sa giimbestigahan si Tatay Berteng Derecho, nga nakita nga nag-uli og pitaka nga posibleng kalabot sa suspek.
Sumala kang Ely Llano, spokesperson sa NBI-SEMRO, kung wala ang maong edaran nga lalaki, posibleng nakabantay pa si Kapitan Bucol sa sakyanan nga gisakyan sa suspek ug nakalikay pa unta sa pagpusil.
Gipasabot ni Llano nga ang lalaki nahimong distraction sa biktima, tungod kay nag-istorya sila sa samang higayon nga hinay nga miagi ang sakyanan, nga posible nga gigamit sa suspek aron makuha ang klaro nga shooting angle sa kapitan.
Ang NBI nagpahimangno nga padayon ang ilang masusi nga imbestigasyon ug gi-awhag ang publiko nga mohatag dayon og impormasyon aron mapadali ang pagkilala sa mga responsable sa krimen.
