Mokabat sa kapin 4 milyon ang kantidad sa iligal nga droga ang nakumpiska sa mga otoridad atol sa gilusad nga drug buybust operation.
Subay sa report, nadakpan sa mga otoridad ang duha ka mga suspetsado atol sa usa gipahigayon nga drug buy-bust operation kagahapon sa kaadlawon sa Purok 7, Barangay Ising, Carmen Davao del Norte.
Giila ni Nephi Noli Dimaandal, ang tigpamaba sa PDEA XI, ang mga suspek nga sila si alyas Dodong ug Jun, nga nasikop alas 2:48 sa kaadlawon.
Sumala ni Dimaandal, nadakpan ang duha human silang masakpan nga nagtinabangay sa pagpamaligya sa usa ka medium heat-sealed transparent plastic sachet nga adunay sulod nga mga 25 gramos nga gituohang shabu, nga adunay gibana-banaan nga street value nga ₱125,000, ngadto sa usa ka PDEA poseur-buyer.
Samtang atol sa pagrekisa sa mga suspetsado nakumpiska pa sa operasyon ang dugang 11 ka mga pakete sa gituohang shabu nga lain-lain ang gidak-on, nga mitimbang og 550 gramos nga gibana-banaan nga adunay street value nga nagkantidad og ₱4,400,000. Narekober usab sa mga otoridad ang drug paraphernalia ug ang marked buy-bust money.
Sa kinatibuk-an ang nakumpiska nga iligal nga droga nagkantidad og ₱4,525,000.
Sumala pa sa mga otoridad nga ang nasampit nga operasyon usa ka coordinated effort tali sa mga operatiba sa Philippine Drug Enforcement Agency (PDEA) XI, ilabi na ang Davao del Norte ug Davao de Oro provincial offices, kauban ang 2nd Davao del Norte Provincial Mobile Force Company ug ang Carmen Municipal Police Station.
Ang mga suspek ang anaa na karon sa kostudiya sa PDEA samtang gipasakahan na kini og kaso nga pagsupak sa Republic Act 9165 (Comprehensive Dangerous Drugs Act of 2002).
