Gipasalig ni Ombudsman Jesus Crispin Remulla nga dili sila magpadala og impluwensya sa ilahang imbestigasyon kabahin sa flood control scandal.
Sa usa ka exclusive interview sa Bombo Radyo, gibutyag ni Remulla nga adunay pipila niini ka mga higala nga apil sa giakusahan, apan mas bug-at kuno ang kaayohan sa nasud kaysa personal nga relasyon.
Kahinumdoman nga una na niyang giingon sa publiko nga gitawagan siya sa kanhing House Speaker Ferdinand Martin Romualdez aron maghatag og klaro kabahin sa isyu sa budget insertions.
Apan, giinsistir sa Ombudsman nga nakatutok lamang sila sa katuyoan sa imbestigasyon ug mapasakahan gihapon og kaso ang bisan kinsang tinuod nga nalambigit sa korapsyon.
Gawas sa kanhing House Speaker, adunay uban pa kuno nga misulay og pakig-istorya kaniya.
Sumala ni Remulla, pipila sa mga tawo nga gusto makig-istorya kaniya ang personal niyang kaila, paryente sa iyang higala, o kauban sa iyang mga kaila.
Gipasalig niya nga sa ebidensya lamang ibase ang ilahang aksyon ug dili sa bisan unsang hangyo gikan sa personalidad.
